Tove Kingren
Sámi duodji stiftelse
Johnny Henrik Skum ja Even Nikolai Kumunen oaččuiga jagi 2019 stipeandda.
Tove Kingrena Sámi duodji vuođđudusa stivra lea mearridan juolludit stipeandda jagi 2019 ovddas Johnny Henrik Skumai ja Even Nikolai Kuhmunenii.
Johnny Henrik oažžu 120 000 ruvdnosaš stipeandda. Stivrra mielas su duodjis lea dakkár dássi ahte ánssáša stipeandda. Stipeandda son áigu atnit oastit mašiinnaid ja rusttegiid.
Johnny Henrik Skum lea Mázes eret ja lea iežas áddjá luhtte leamaš oahpahallin. Dál lea ásaheame duodjebáikki Mázii, gos su áddjá galgá su bagadallat. Son duddjo eanáš gietkamiid ja guvssiid.
Even Nikolai Kuhmunen (21) lea ges ožžon 30 000 ruvdnosaš stipeandda. Son lea duodjeoahpahalli Duodjeinstituhtas Guovdageainnus ja stipeandda áigu atnit reaidduide ja rusttegiidda.
Vuođđudusa stivra lea ovttaoaivilis ahte buot formálalaš gáibádusat leat ollašuvvon ja sávvet ahte stipeanda movttiida ain eambbo dudjot.
Inger Julianne oaččui jagi 2018 stipeandda
Tove Kingren vuođđudus lea mearridan addit Inger Julianne Eirai jagi 2018 stipeandda. Inger Julianne lea 29 jahkásaš duodjestudeantta, Guovdageainnus eret. Sutnje lea duodji hui láhka váimmu ja su niehku lea ahte beasašii ollesáiggi bargat dujiin.
Son lea leamaš duodjeoahpahallin guokte jagi ja lea fágareive duojis. Son lea maid Sámi oahpahusguovddážis johkamohkis guokte jagi studeren duoji. Dál lea Sámi allaskuvllas árbevirolaš duoji bajásdoallan ja ealáskahttin fága maiddai lohkame.
-Mus lea olu vel oahppat duoji birra ja duddjomis, ja iežan mielas lea duodji dakkár maid ii oahpa beaivvis ii ge jagis. Dan oahppa olles eallima, ja juohke beaivvi oahppá ođđasa duojis.
Inger Julianne dadjá ahte lea dehálaš seailluhit ja nannet duoji. Duodjái čatnasit sierra sánit maid ii geavat eará dalle go duddjo. Duodjái gullet maiddai sámi árbevierut ja eallinvuogit mat jávket jus duodji ii gávdnošii, ja danin lea dehálaš ahte nuoraide maid addo dát árbi.
-Stipeandda háliidan geavahit dakkár duodjeprošeavttaide, maid in leat ovdal duddjon. Háliidan earret eará liinni oahppat gođđit, čuoldit dávleboahkána, ja lávžžiid oahppat eanet dahkat, dadjá Inger Julianne.
Per Thomas Aira Balto oaččui jagi 2017 stipeandda
Tove Kingren Sámi duoji vuođđudusa stivra lea mearridan juolludit jagi 2017 stipeandda Per Thomas Aira Baltoi. Per Thomasa duojis lea dakkár kvalitehta ahte stivrra mielas son ánssáša stipeandda. Stipeanda galgá veahkehit Per Thomasa nu ahte sáhttá ávdnasiid, mašiinnaid ja rusttegiid oastit dadjá vuođđudusa stivra.
Vuođđudusa stivra lea ovttaoaivilis ahte Per Thomas deavdá buot formálalaš gáibádusaid ja sávvá ahte stipeanda ain movttiidahttá su duddjot. Stipeanda lea jagi 2017, 63 500 norgga ruvnno.
Per Thomas Aira Balto (22) eadni lea johkamohkis eret ja áhčči fas Kárášjohkalaš, nu sus lea gullevašvuohta sihke davvi- ja lullisámiguvlui. Son lohka dál vuosttaš jagi muorra- ja čoarveduoji oahpu sámi oahpahusguovddážis Johkamohkis, ja háliidivččii vel joatkit jagi. Son lea maid oahppan inšenevra sihkarvuođas ja birrásis.
Per Thomas lea ilolaš go oažžu stipeandda ja dadjá ahte dát addá movtta dudjot. Son áigu stipeanddain oastit ávdnasiid, mašiinnaid ja rusttegiid. Per Thomas liiko dudjot árbevirolaš dujiid ja lea maid ieš ráhkadan johkafatnasa. Son háliidivččii ain eambbo máhtu johkafatnasa huksema birra ja árbedieđuid birra mat dasa čatnasit.
Inga Maybritt Bongo oaččui stipeandda 2014 ovddas.
- Hui stuora gudni ja somá oažžut dakkár stipeandda. Dat stipeanda lei oalle stuoris dan jagi ja oassi das manná stuorat goarrunmašiinna oastit. Muđui in leat vel mearridan masa reasta ruđain áiggun geavahit, muhto árvideames dakkár investeremiidda mat leat buorrin mu fitnodahkii ja dan ovdáneapmái, dadjá Inga Maybritt Bongo.
2013 rájes lea Inga Maybritt Bongos leamašan iežas duodjefitnodat mas son bargá seammás go gazzá duodjeoahpu. Son lea guokte jagi vázzán duodjeoahpu Johkamohkis, leamašan duodjehárjehalli eatnis luhtte guokte jagi ja sus lea dál fágareive duojis. Son lea maid dasa lassin Sámi allaskuvllas lohkan duodjeoahpu.
Vuođđudus juolludi sutnje stipeandda go su duojis ja skuvlabargguin lea allá dássi ja go son áigu ain bargat ovdanahttit iežas fitnodaga.
--------------------------------------------------------------------
Ove Stødle ožžon 2013 stipeandda
Tove Kingren sámi duodji vuođđudusa stivra lea mearridan juohkit 2013 stipeandda Ove Stødlii. -Su duodji doallá dakkár dási ahte son ánssáša stipeandda ja stipeanda galgá váikkuhit ahte son sáhttá áin eambbo oahpu gazzat” cealká vuođđudusstivra.
Tove Kingren sámi duodji vuođđudus lea mearridan addit 2013 stipeandda Ove Stødlii. Vuođđudusa stivra cealká ahte Ove Stødle deavdá buot formálalaš gáibádusaid oažžut stipeandda ja dasa lassin lea stivra veardidan ahte Stødle duodji doallá alla dási ja ahte stipeanda sáhttá váikkuhit ahte son beassá ain eambbo oahpu gazzat. Jagi 2013 ovddas stipeandda sturrodat lei 67 000 ruvnno.
Ove Stødle, Dommos Máreha Sara Ove, lea 27 jahkásaš duojár gii lea Billávuonas eret. Son bargá garrá dujiin ja lea earret eará lohkan Sámi oahpahusguovddážis Johkamohkis ja maiddai áigu lohkat duodjefágaid Sámi allaskuvllas.
- Lea stuora gudni munnje oažžut stipeandda ja dat maid movttiidahttá mu ain bargat garra dujiin ja gazzat eambbo oahpu. Dáppe riddoguovllus eai leat nu máŋggas geat barget garra dujiin ja dan dihte lea hui somá go vuođđudusstivra geahččá dobbelii.
Stipeandda áigu Stødle atnit ovdanahttit iežas duddjonmáhtu ain eanet.
- Mun áiggun bargat fitnodatovdánahttimiin, iskat iešguđetgelágan ideaid ja maiddai gávdnat iežan stiilla. Mus lea miella dahkat dujiid mat leat čábbát ja mat leat heivehuvvon modearna áigái. Sámi garraduodji lea hui vuđolaččat ráhkaduvvon, sihke detáljjaid ja hámi dáfus, dasa lassin lea duodji maid hui geavatlaččat hábmejuvvon. Duddjomis sáhttá leat hui kreatiiva, muhto ferte atnit muittus dan árbevieru. Dan dihte lea dehálaš dutkat ja oahppat duoji birra ovdal go sáhttá álgit ovdanahttit duoji, dadjá Stødle.
--------------------------------------------------------------------
Tove Kingren stipeanda jagi 2012 ovddas juhkkojuvvui Sara Marielle Gaupai.
Sara Marielle Gaup lea guhka duddjon ja sus lea sihke joatkkaskuvlaoahppu ja fágareive (svennebreva) duojis. Son lea čájehan ahte máhttá duddjot árbevirolaš vuohkái, ovdamearka dihte gápmagiid, gálssohiid ja bittuid, gahpiriid, sistegávttiid, dorkkaid ja beaskkaid, ja nu viidáseappot. Son lea maiddai čájehan ahte máhta ráhkadit ođđamállet biktasiid árbevirolaš jurddašanvuogi mielde.
Jagi 2012 ovddas stipeanda lei 116 000 ruvnno.